Foydalanuvchini ro`yxatdan o`tkazish

FOYDALANUVChI ShARTNOMASI

Mazkur foydalanuvchi shartnomasi (keyingi o‘rinlarda – Shartnoma) O‘zbekiston Respublikasi Fuqarolik kodeksi 369-moddasiga asosan “O‘zbekiston Respublikasi Prezidenti huzuridagi Loyiha boshqaruvi milliy agentligi qoshidagi Elektron hukumat va raqamli iqtisodiyot loyihalarini boshqarish markazi” DUKning (keyingi o‘rinlarda – Markaz) ommaviy ofertasi hisoblanadi hamda istalgan murojaat qilgan jismoniy va yuridik shaxslar (keyingi o‘rinlarda – Foydalanuvchi) bilan tuziladigan mazkur Shartnoma “Elektron hukumat” tizimi foydalanuvchilarini identifikasiyalashning yagona axborot tizimidan (keyingi o‘rinlarda – IYaAT) foydalanish shartlari va qoidalarini belgilab beradi.

Mazkur Shartnomaning shartlari barcha Foydalanuvchilar uchun bir xildir.

1. Atamalar va ta'riflar

Elektron hukumat — davlat organlarining jismoniy va yuridik shaxslarga davlat xizmatlarini axborot-kommunikasiya texnologiyalari, shuningdek, idoralararo elektron hamkorlikni joriy qilish orqali ko‘rsatishga yo‘naltirilgan tashkiliy-huquqiy choralar-tadbirlar va texnik resurslar tizimi;

elektron davlat xizmati — arizachining so‘roviga asosan davlat organlari o‘z funksiyalarini amalga oshirishida axborot-kommunikasiya texnologiyalarini qo‘llagan holda ko‘rsatiladigan xizmat. Qonunchilik bilan ularga davlat xizmatlarini ko‘rsatish bo‘yicha funksiya yuklatilgan bo‘lgan taqdirda davlat xizmatlarini boshqa tashkilotlar ham ko‘rsatishi mumkin;

foydalanuvchi – soliq organlarida hisobda turadigan, soliq to‘lovchining identifikasiya raqami (STIR) va jismoniy shaxsning shaxsiy identifikasiya raqamiga (JShShIR) ega, davlat xizmatiga muhtoj hamda xizmatdan foydalanish texnik imkoniyati mavjud bo‘lgan, mazkur Shartnomada ko‘rsatib o‘tilgan shartlar bo‘yicha ushbu Shartnomani tuzganlar;

  • jismoniy shaxs – O‘zbekiston Respublikasi fuqarosi, chet ellik fuqaro, fuqaroligi bo‘lmagan shaxs;
  • yuridik shaxs – O‘zbekiston Respublikasi qonunchiligiga asosan tashkil etilgan tashkilot;

ERI – Davlat xizmatlari markazlaridan olinishi mumkin bo‘lgan elektron raqamli imzo.

2. Shartnoma predmeti

2.1. Markaz IYaAT mulkdori bo‘la turib jismoniy va yuridik shaxslarga elektron davlat xizmatlariga ruxsat olib foydalanish imkonini berish uchun IYaATda ro‘yxatga o‘tish imkoniyatini beradi.

2.2. Foydalanuvchilarning “Elektron hukumat” tizimidan foydalanishalari uchun IYaAT haqqoniy identifikasiya, autentifikasiya va ro‘yxatdan o‘tishni ta'minlab beradi.

3. Shartnoma tuzish tartibi

3.1. Jismonish shaxs IYaATda ro‘yxatdan o‘tayotganda mazkur Shartnomaning shartlarini so‘zsiz va to‘liq qabul qiladi hamda interaktiv davlat xizmatlarini olishda “Elektron hukumat” tizimi Foydalanuvchilarini identifikasiya, autentifikasiya va ro‘yxatdan o‘tkazishning haqqoniyligini ta'minlash uchun uning shaxsiy ma'lumotlarini qayta ishlashga rozilik beradi.

3.2. Foydalanuvchi mazkur Shartnomaning barcha shartlari bilan IYaATda ro‘yxatdan o‘tish yakunlanganiga qadar tanishib chiqishi lozim. IYaATda ro‘yxatdan o‘tayotgan Foydalanuvchi mazkur Shartnomaning barcha shartlari bilan tanishib chiqqan va ularga rozi hisoblanadi, ayni damda Shartnoma mazkur ommaviy oferta shartlari asosida yozma shaklda tuzilgan hamda ikki tomonlama imzolangan Shartnoma hisoblanadi. Jismoniy shaxsning IYaATda ro‘yxatdan o‘tishi mazkur Shartnomaning tuzilgan vaqti hisoblanadi.

4. IYaATda Ro‘yxatdan o‘tishning shartlari

4.1. Foydalanuvchi jismoniy shaxs IYaATda ro‘yxatdan o‘tishi uchun quyidagi ma'lumotlarni ko‘rsatishi lozim:

  • biometrik pasport ma'lumotlari (JShShIR, biometrik pasportning seriya va raqami (keyingi o‘rinlarda – shaxsiy ma'lumotlar));
  • hisobga olish yozuvini dastlabki faollashtirish kodini olish hamda login va parol' yo‘qotilgan hollarda hisobga olish yozuvini qayta tiklash uchun amaldagi mobil telefon raqami;
  • amaldagi elektron pochta manzili (login va parol' yo‘qotilgan hollarda hisobga olish yozuvini qayta tiklash uchun).

Elektron raqamli imzo (keyingi o‘rinlarda – ERI) kalitlarining sertifikatlari mavjud bo‘lgan taqdirda Foydalanuvchi o‘zining hisobga olish yozuvini ro‘yxatdan o‘tish jarayonida ERIdan foydalangan holda tasdiqlashi mumkin. ERI kalitlari sertifikati mavjud bo‘lmagan taqdirda ERIdan foydalangan holda hisobga olish yozuvini tasdiqlashni IYaATdan keyingi ro‘yxatdan o‘tish jarayonlarida amalga oshirish mumkin.

4.2. IYaATdan ro‘yxatdan o‘tish jarayonida ERI kaliti sertifikati amalda bo‘lishi lozim.

4.3. Foydalanuvchi yuridik shaxs IYaATdan ro‘yxatdan o‘tish uchun dastlab jismoniy shaxsning hisobga olish yozuvini 4.1. bandga asosan ro‘yxatdan o‘tkazishi lozim.

jismoniy shaxsning hisobga olish yozuvi yaratilgandan so‘ng jismoniy shaxsning kabinetida yuridik shaxsni:

  • Yuridik shaxsning ERI kaliti sertifikati;
  • Yuridik shaxsning STIR orqali qo‘shishi lozim.

4.4. 8-son hisobot shaklini to‘ldiradigan va O‘zbekiston Respublikasi Davlat soliq qo‘mitasiga taqdim etadigan shaxslar yuridik shaxslarning ro‘yxatdan o‘tishini amalga oshirishlari mumkin.

4.5. Shuningdek, mas'ul shaxs tomonidan 4.4.-bandga asosan yuridik shaxsni ro‘yxatdan o‘tkazilgandan so‘ng tashkilotning mazkur yuridik shaxs nomidan faoliyat yuritish huquqiga ega bo‘lgan mas'ul xodimini qo‘shish imkoniyati mavjud bo‘ladi. Buning uchun, yuridik shaxsni IYaATda ro‘yxatdan o‘tkazgandan so‘ng ro‘yxatdan o‘tkazishni amalga oshirgan shaxs hisobga olish yozuvida mas'ul xodimning JShShIRni ko‘rsatib o‘tadi va unga foylanish imkoniyatini ochib beradi.

5. Foydalanuvchi huquq va majburiyatlari

5.1. Foydalanuvchi:

  • IYaATdagi o‘zining hisobga olish yozuvidan davlat xizmatlari ko‘rsatadigan davlat organlari va boshqa tashkilotlarning idoralararo elektron hamkorlikdan ruxsat olib foydalanish imkonini olish;
  • o‘zining hisobga olish yozuvini o‘chirib tashlash huquqiga ega.

5.2. IYaAT Foydalanuvchisi:

  • IYaATning yoki unga ulangan axborot tizimlarining faoliyat ko‘rsatish jarayonlarini buzishga yo‘naltirilgan harakatlarni amalga oshirmaslikka;
  • Shaxsiy ma'lumotlardan foydalanish shartlari talablariga amal qilishga majbur.

6. Markazning huquq va majburiyatlari

6.1. Markaz:

  • Foydalanuvchiining IYaATdagi harakatlarini monitoring qilish;
  • Foydalanuvchi tomonidan mazkur Shartnomaning talablari buzilgan hollarda IYaATga ulangan axborot tizimlaridan foylanish imkoniyatini cheklab qo‘yish, shu jumladan Foydalanuvchining IYaATdagi hisobga olish yozuvini bloklab qo‘yish orqali;
  • Foydalanuvchini oldindan ogohlantirmasdan IYaATdan foydalanishning mazkur shartlarini o‘zgartirish;
  • Foydalanuvchiga axborot xabarlarini yo‘naltirib turish huquqiga ega.

6.2. Markaz:

  • IYaATning faoliyat ko‘rsatishini ta'minlash, shu jumladan IYaATga ulangan axborot tizimlaridan foydalanishda IYaAT foydalanuvchilarini identifikasiya, ro‘yxatdan o‘tish va autentifikasiya qilish funksiyalarining uzluksiz faoliyat ko‘rsatishini;
  • IYaATdagi foydalanuvchilar ma'lumotlarining butunligi va o‘zgarmasligini kafolatlash;
  • foydalanuvchilarning IYaATga murojaatlari hisobi va statistikasini yuritish;
  • qonunchilik va shaxsiy ma'lumotlardan foydalanish shartlari talablariga binoan foydalanuvchining shaxsiy ma'lumotlari himoyasini ta'minlashga majbur.

7. Shartnomaning amal qilish muddati

7.1. Mazkur Shartnoma Foydalanuvchini IYaATda ro‘yxatdan o‘tkazish jarayonida kuchga kiradi hamdaTomonlarning uni to‘liq amalga oshirgunicha o‘z kuchida bo‘ladi.

8. Javobgarlik

8.1. Markaz o‘zining aybi bilan bog‘liq bo‘lmagan holda yuzaga kelgan shaxsiy ma'lumotlarning yo‘qolishiga Foyldalanuvchi oldida javobgar bo‘lmaydi.

8.2. Quyidagilar sabab IYaATda uzilishlar yoki ishlash imkoniyati mavjud bo‘lmagan hollarida uzulishlar yoki ishlash imkoniyati mavjud bo‘lmaganligi uchun Markaz javobgar bo‘lmaydi:

  • uchinchi tomonning IYaAT dasturiy ta'minotidan ruxsatsiz foydalanishga va/yoki ko‘rsatib o‘tilgan dasturiy ta'minotni ishdan chiqarishga yo‘naltirilgan harakatlari.

8.3. Foydalanuvchi shaxsiy ma'lumotlar uchun fuqarolik va jinoiy qonunchilik, shuningdek, ma'muriy qoidabuzarliklar to‘g‘risidagi qonunchilik talablariga binoan to‘liq tarzda javobgarlikni o‘z bo‘yniga oladi.

8.4. Foydalanuvchi mazkur Shartnoma bo‘yicha o‘z majburiyatlariga amal qilmasligi oqibatida Markazga yetkazilgan zarar uchun javobgarlikni o‘z zimmasiga oladi.

8.5. Tomonlar ushbu shartnoma bo‘yicha majburiyatlarning bajarilmasligi shartnoma tuzilgandan keyin, Tomonlar oldindan ko‘ra bilmagan, oqilona chora-tadbirlar bilan bartaraf eta olishmagan, favqulodda tusdagi hodisalar natijasida paydo bo‘lgan yengib bo‘lmaydigan kuch holatlari (fors-major) oqibatida sodir bo‘lgan taqdirda tomonlar majburiyatlarning qisman yoki to‘liq bajarilmaganligi uchun javobgarlikdan ozod qilinadilar. Favqulotda holatlarga quyidagilar kiradi: suv toshqini, zilzila, yer ko‘chishi va boshqa tabiiy ofatlar; urush yoki harbiy harakatlar, embargo, bloklash, Shartnomani amalga oshirishga qarshilik qiladigan hokimiyatning harakatlari.

9. E'tirozlarni ko‘rib chiqish tartibi

9.1. Mazkur Shartnoma bo‘yicha Markaz majburiyatlarni bajarmagan yoki lozim darajada bajarmagan hollarda Foydalanuvchi Markazga o‘z e'tirozlarini yozma ravishda taqdim etish huquqiga ega.

9.2. Markaz e'tirozni uni olgan kundan boshlab o‘n besh kun ichida ko‘rib chiqishi va unga javob berishga majbur. E'tirozga javob buyurtma xat, elektron tarzda yoki Foydalanuvchining olganligi to‘g‘risidagi yozuvi orqali taqdim etiladi.

10. Nizolarni hal etish tartibi

10.1. Mazkur Shartnomaning bajarilishi yuzasidan barcha nizo va kelishmovchiliklar O‘zbekiston Respublikasining amaldagi qonunchiliklariga binoan hal etiladi.