Foydalanuvchini ro`yxatdan o`tkazish

ФОЙДАЛАНУВЧИ ШАРТНОМАСИ

Мазкур фойдаланувчи шартномаси (кейинги ўринларда – Шартнома) Ўзбекистон Республикаси Фуқаролик кодекси 369-моддасига асосан “Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Электрон ҳукумат ва рақамли иқтисодиёт лойиҳаларини бошқариш маркази” ДУКнинг (кейинги ўринларда – Марказ) оммавий офертаси ҳисобланади ҳамда исталган мурожаат қилган жисмоний ва юридик шахслар (кейинги ўринларда – Фойдаланувчи) билан тузиладиган мазкур Шартнома “Электрон ҳукумат” тизими фойдаланувчиларини идентификациялашнинг ягона ахборот тизимидан (кейинги ўринларда – ИЯАТ) фойдаланиш шартлари ва қоидаларини белгилаб беради.

Мазкур Шартноманинг шартлари барча Фойдаланувчилар учун бир хилдир.

1. Атамалар ва таърифлар

Электрон ҳукумат — давлат органларининг жисмоний ва юридик шахсларга давлат хизматларини ахборот-коммуникация технологиялари, шунингдек, идоралараро электрон ҳамкорликни жорий қилиш орқали кўрсатишга йўналтирилган ташкилий-ҳуқуқий чоралар-тадбирлар ва техник ресурслар тизими.

электрон давлат хизмати — аризачининг сўровига асосан давлат органлари ўз функцияларини амалга оширишида ахборот-коммуникация технологияларини қўллаган ҳолда кўрсатиладиган хизмат. Қонунчилик билан уларга давлат хизматларини кўрсатиш бўйича функция юклатилган бўлган тақдирда давлат хизматларини бошқа ташкилотлар ҳам кўрсатиши мумкин;

Фойдаланувчи – солиқ органларида ҳисобда турадиган, солиқ тўловчининг идентификация рақами (СТИР) ва жисмоний шахснинг шахсий идентификация рақамига (ЖШШИР) эга, давлат хизматига муҳтож ҳамда хизматдан фойдаланиш техник имконияти мавжуд бўлган, мазкур Шартномада кўрсатиб ўтилган шартлар бўйича ушбу Шартномани тузганлар.

  • жисмоний шахс – Ўзбекистон Республикаси фуқароси, чет эллик фуқаро, фуқаролиги бўлмаган шахс;
  • юридик шахс – Ўзбекистон Республикаси қонунчилигига асосан ташкил этилган ташкилот

ЭРИ – Давлат хизматлари марказларидан олиниши мумкин бўлган электрон рақамли имзо.

2. Шартнома предмети

2.1. Марказ ИЯАТ мулкдори бўла туриб жисмоний ва юридик шахсларга электрон давлат хизматларига рухсат олиб фойдаланиш имконини бериш учун ИЯАТда рўйхатга ўтиш имкониятини беради.

2.2. Фойдаланувчиларнинг “Электрон ҳукумат” тизимидан фойдаланишалари учун ИЯАТ ҳаққоний идентификация, аутентификация ва рўйхатдан ўтишни таъминлаб беради.

3. Шартнома тузиш тартиби

3.1. Жисмониш шахс ИЯАТда рўйхатдан ўтаётганда мазкур Шартноманинг шартларини сўзсиз ва тўлиқ қабул қилади ҳамда интерактив давлат хизматларини олишда “Электрон ҳукумат” тизими Фойдаланувчиларини идентификация, аутентификация ва рўйхатдан ўтказишнинг ҳаққонийлигини таъминлаш учун унинг шахсий маълумотларини қайта ишлашга розилик беради.

3.2. Фойдаланувчи мазкур Шартноманинг барча шартлари билан ИЯАТда рўйхатдан ўтиш якунланганига қадар танишиб чиқиши лозим. ИЯАТда рўйхатдан ўтаётган Фойдаланувчи мазкур Шартноманинг барча шартлари билан танишиб чиққан ва уларга рози ҳисобланади, айни дамда Шартнома мазкур оммавий оферта шартлари асосида ёзма шаклда тузилган ҳамда икки томонлама имзоланган Шартнома ҳисобланади. Жисмоний шахснинг ИЯАТда рўйхатдан ўтиши мазкур Шартноманинг тузилган вақти ҳисобланади.

4. ИЯАТда Рўйхатдан ўтишнинг шартлари

4.1. Фойдаланувчи жисмоний шахс ИЯАТда рўйхатдан ўтиши учун қуйидаги маълумотларни кўрсатиши лозим:

  • биометрик паспорт маълумотлари (ЖШШИР, биометрик паспортнинг серия ва рақами (кейинги ўринларда – шахсий маълумотлар));
  • ҳисобга олиш ёзувини дастлабки фаоллаштириш кодини олиш ҳамда логин ва пароль йўқотилган ҳолларда ҳисобга олиш ёзувини қайта тиклаш учун амалдаги мобил телефон рақами;
  • амалдаги электрон почта манзили (логин ва пароль йўқотилган ҳолларда ҳисобга олиш ёзувини қайта тиклаш учун).

Электрон рақамли имзо (кейинги ўринларда – ЭРИ) калитларининг сертификатлари мавжуд бўлган тақдирда Фойдаланувчи ўзининг ҳисобга олиш ёзувини рўйхатдан ўтиш жараёнида ЭРИдан фойдаланган ҳолда тасдиқлаши мумкин. ЭРИ калитлари сертификати мавжуд бўлмаган тақдирда ЭРИдан фойдаланган ҳолда ҳисобга олиш ёзувини тасдиқлашни ИЯАТдан кейинги рўйхатдан ўтиш жараёнларида амалга ошириш мумкин.

4.2. ИЯАТдан рўйхатдан ўтиш жараёнида ЭРИ калити сертификати амалда бўлиши лозим.

4.3. Фойдаланувчи юридик шахс ИЯАТдан рўйхатдан ўтиш учун дастлаб жисмоний шахснинг ҳисобга олиш ёзувини 4.1. бандга асосан рўйхатдан ўтказиши лозим.

жисмоний шахснинг ҳисобга олиш ёзуви яратилгандан сўнг жисмоний шахснинг кабинетида юридик шахсни:

  • Юридик шахснинг ЭРИ калити сертификати;
  • Юридик шахснинг СТИР орқали қўшиши лозим.

4.4. 8-сон ҳисобот шаклини тўлдирадиган ва Ўзбекистон Республикаси Давлат солиқ қўмитасига тақдим этадиган шахслар юридик шахсларнинг рўйхатдан ўтишини амалга оширишлари мумкин.

4.5. Шунингдек, масъул шахс томонидан 4.4.-бандга асосан юридик шахсни рўйхатдан ўтказилгандан сўнг ташкилотнинг мазкур юридик шахс номидан фаолият юритиш ҳуқуқига эга бўлган масъул ходимини қўшиш имконияти мавжуд бўлади. Бунинг учун, юридик шахсни ИЯАТда рўйхатдан ўтказгандан сўнг рўйхатдан ўтказишни амалга оширган шахс ҳисобга олиш ёзувида масъул ходимнинг ЖШШИРни кўрсатиб ўтади ва унга фойланиш имкониятини очиб беради.

5. Фойдаланувчи ҳуқуқ ва мажбуриятлари

5.1. Фойдаланувчи:

  • ИЯАТдаги ўзининг ҳисобга олиш ёзувидан давлат хизматлари кўрсатадиган давлат органлари ва бошқа ташкилотларнинг идоралараро электрон ҳамкорликдан рухсат олиб фойдаланиш имконини олиш;
  • ўзининг ҳисобга олиш ёзувини ўчириб ташлаш ҳуқуқига эга.

5.2. ИЯАТ Фойдаланувчиси:

  • ИЯАТнинг ёки унга уланган ахборот тизимларининг фаолият кўрсатиш жараёнларини бузишга йўналтирилган ҳаракатларни амалга оширмасликка;
  • Шахсий маълумотлардан фойдаланиш шартлари талабларига амал қилишга мажбур.

6. Марказнинг ҳуқуқ ва мажбуриятлари

6.1. Марказ:

  • Фойдаланувчиининг ИЯАТдаги ҳаракатларини мониторинг қилиш;
  • Фойдаланувчи томонидан мазкур Шартноманинг талаблари бузилган ҳолларда ИЯАТга уланган ахборот тизимларидан фойланиш имкониятини чеклаб қўйиш, шу жумладан Фойдаланувчининг ИЯАТдаги ҳисобга олиш ёзувини блоклаб қўйиш орқали;
  • Фойдаланувчини олдиндан огоҳлантирмасдан ИЯАТдан фойдаланишнинг мазкур шартларини ўзгартириш;
  • Фойдаланувчига ахборот хабарларини йўналтириб туриш ҳуқуқига эга.

6.2. Марказ:

  • ИЯАТнинг фаолият кўрсатишини таъминлаш, шу жумладан ИЯАТга уланган ахборот тизимларидан фойдаланишда ИЯАТ фойдаланувчиларини идентификация, рўйхатдан ўтиш ва аутентификация қилиш функцияларининг узлуксиз фаолият кўрсатишини;
  • ИЯАТдаги фойдаланувчилар маълумотларининг бутунлиги ва ўзгармаслигини кафолатлаш;
  • фойдаланувчиларнинг ИЯАТга мурожаатлари ҳисоби ва статистикасини юритиш;
  • қонунчилик ва шахсий маълумотлардан фойдаланиш шартлари талабларига биноан фойдаланувчининг шахсий маълумотлари ҳимоясини таъминлашга мажбур.

7. Шартноманинг амал қилиш муддати

7.1. Мазкур Шартнома Фойдаланувчини ИЯАТда рўйхатдан ўтказиш жараёнида кучга киради ҳамдаТомонларнинг уни тўлиқ амалга оширгунича ўз кучида бўлади.

8. Жавобгарлик

8.1. Марказ ўзининг айби билан боғлиқ бўлмаган ҳолда юзага келган шахсий маълумотларнинг йўқолишига Фойлдаланувчи олдида жавобгар бўлмайди.

8.2. Қуйидагилар сабаб ИЯАТда узилишлар ёки ишлаш имконияти мавжуд бўлмаган ҳолларида узулишлар ёки ишлаш имконияти мавжуд бўлмаганлиги учун Марказ жавобгар бўлмайди:

  • учинчи томоннинг ИЯАТ дастурий таъминотидан рухсатсиз фойдаланишга ва/ёки кўрсатиб ўтилган дастурий таъминотни ишдан чиқаришга йўналтирилган ҳаракатлари.

8.3. Фойдаланувчи шахсий маълумотлар учун фуқаролик ва жиноий қонунчилик, шунингдек, маъмурий қоидабузарликлар тўғрисидаги қонунчилик талабларига биноан тўлиқ тарзда жавобгарликни ўз бўйнига олади.

8.4. Фойдаланувчи мазкур Шартнома бўйича ўз мажбуриятларига амал қилмаслиги оқибатида Марказга етказилган зарар учун жавобгарликни ўз зиммасига олади.

8.5. Томонлар ушбу шартнома бўйича мажбуриятларнинг бажарилмаслиги шартнома тузилгандан кейин, Томонлар олдиндан кўра билмаган, оқилона чора-тадбирлар билан бартараф эта олишмаган, фавқулодда тусдаги ҳодисалар натижасида пайдо бўлган енгиб бўлмайдиган куч ҳолатлари (форс-мажор) оқибатида содир бўлган тақдирда томонлар мажбуриятларнинг қисман ёки тўлиқ бажарилмаганлиги учун жавобгарликдан озод қилинадилар. Фавқулотда ҳолатларга қуйидагилар киради: сув тошқини, зилзила, ер кўчиши ва бошқа табиий офатлар; уруш ёки ҳарбий ҳаракатлар, эмбарго, блоклаш, Шартномани амалга оширишга қаршилик қиладиган ҳокимиятнинг ҳаракатлари.

9. Эътирозларни кўриб чиқиш тартиби

9.1. Мазкур Шартнома бўйича Марказ мажбуриятларни бажармаган ёки лозим даражада бажармаган ҳолларда Фойдаланувчи Марказга ўз эътирозларини ёзма равишда тақдим этиш ҳуқуқига эга.

9.2. Марказ эътирозни уни олган кундан бошлаб ўн беш кун ичида кўриб чиқиши ва унга жавоб беришга мажбур. Эътирозга жавоб буюртма хат, электрон тарзда ёки Фойдаланувчининг олганлиги тўғрисидаги ёзуви орқали тақдим этилади.

10. Низоларни ҳал этиш тартиби

10.1. Мазкур Шартноманинг бажарилиши юзасидан барча низо ва келишмовчиликлар Ўзбекистон Республикасининг амалдаги қонунчиликларига биноан ҳал этилади.